काठमाडौं । चालु आर्थिक वर्षको पहिलो त्रैमासिकमा राष्ट्रिय स्तरका विकास बैंकहरुले करिब साढे १ अर्ब रुपैयाँको नाफा आर्जन गरेका छन् । बैंकहरुले सार्वजनिक गरेको वित्तीय विवरणअनुसार असोजन मसान्तसम्म ८ वटा राष्ट्रिय स्तरका विकास बैंकहरुको नाफा १ अर्ब ४६ करोड ४४ लाख ६५ हजार रुपैयाँ पुगेको हो ।
राष्ट्रिय स्तरका विकास बैंकले कमाएको उक्त नाफा गत आवको सोही अवधिको तुलनामा ३६.५८ प्रतिशतले धेरै हो । यी ८ वटा बैंकहरुले गत आवको सोही अवधिमा १ अर्ब ७ करोड २२ लाख ५१ हजार रुपैयाँ नाफा आर्जन गरेका थिए । वित्तीय विवरणअनुसार धेरै नाफा कमाउने विकास बैंकमा मुक्तिनाथ विकास बैंक पहिलो स्थानमा रहेको छ ।
बैंकले पहिलो त्रैमासिकसम्मको अवधिमा २३.१७ प्रतिशतले बढाएको छ । यो बैंकले यो अवधिसम्ममा २८ करोड १८ लाख १९ हजार रुपैयाँ नाफा कमाएको छ । गत आर्थिक वर्षको सोहि अवधिमा कम्पनीको मुनाफा २२ करोड ८८ लाख ७ हजार रुपैयाँ रहेको थियो ।
असोज मसान्तसम्ममा सर्वाधिक नाफा वृद्धि गर्ने बैंकमा ज्योति विकास बैंक पहिलो स्थानमा रहेको छ । बैंकको नाफा १९७ प्रतिशतले बढेर १५ करोड ११ लाख ९० हजार रुपैयाँ पुराएको हो । समिक्षा अवधिमा गरिमा विकास बैंकको नाफा ५६.८२ प्रतिशतले बढेर २६ करोड ६ लाख रुपैयाँ, शाइन रेसुङ्गाको २४.८९ प्रतिशतले बढेर २३ करोड ९३ लाख रुपैयाँ र लुम्बिनी विकास बैंकको १६.५७ प्रतिशतले बढेर २० करोड १९ लाख रुपैयाँ पुगेको छ ।
त्यस्तै कामना सेवा विकास बैंकको नाफा ४६.४० प्रतिशतले बढेर १७ करोड ४९ लाख रुपैयाँ र सांग्रिला डेभलपमेन्ट बैंकको २९.१६ प्रतिशतले बढेर ६ करोड १ लाख रुपैयाँ पुगेको छ । चालु आर्थिक वर्षको पहिलो तीन महिनाको अवधिमा महालक्ष्मी विकास बैंकको नाफा मात्र घटेको हो । बैंकको नाफा १.१४ प्रतिशतले घटेर ९ करोड ४२ लाख रुपैयाँ पुगेको छ ।