काठमाडौं । प्रथम अल नेपाल अन्डर १९ ब्वाईज बास्केटबल प्रतियोगिताको उपाधि मनास्लुले जितेको छ । सोमबार भएको फाइनल खेलमा इम्प्याकट हूप्सलाई पराजित गर्दै मनास्लुले उपाधि उचालेको हो ।
उपाधि सहित मनास्लुले २० हजार रुपैयाँ नगद सहित ट्रफि, मेडल र प्रमाण–पत्र प्राप्त गर्यो भने उपविजेता इम्प्याकट हूप्सले १० हजार नगद सहित ट्रफि, मेडल र प्रमाण–पत्र प्राप्त गरेको आयोजकका अध्यक्ष फुर्वा छिरीङ शेर्पाले जानकारी दिए । अल नेपाल युवा क्लबद्वारा असोज १४ गते विजया दशमी तथा शुभ दिपावलीको अवसरमा युवा र विद्यार्थीहरुलाई खेलकुदको मार्फत जोडने उद्देश्यको साथ प्रतियोगिता आयोजना गरिएको थियो । उक्त प्रतियोगिता सिमलटर स्थित डंकमान्डु बास्केटबल कोर्टमा सम्पन्न भएको हो ।
प्रतियोगिताको विजेता र उपविजेता टोलीलाई प्रमुख अतिथि तथा नेपाल बास्केटबल संघ केन्द्रीय अध्यक्ष भिम सिंग गुरुङले ट्रफि, मेडल र प्रमाणपत्र प्रदान गरेका थिए ।