यो साता नेप्से परिसूचक करिब १ प्रतिशत घटेर बन्द भएको छ । गत साता ३००० दशमलव ८१ विन्दुमा बन्द भएको नेप्से परिसूचक यो साताको कारोबार बन्द हुँदा ०.८८ प्रतिशत अर्थात २६ दशमलव ३५ अंक घटेर २९७४ दशमलव ४६ विन्दुमा बन्द भएको हो ।
५ कारोबार दिनमध्ये ३ दिन मात्रै कारोबार भएको सेयर बजारमा यो साता दुई कारोबार दिन सेयर बजार बढेको थियो भने एक दिन सेयर बजार घटेको थियो । दुई दिन सामान्य बढेको र घटेको दिन उच्च अंकले घट्दा सातामा समग्रमा बजार घटेर बन्द भएको हो । लामो समय पछि सेयर बजार साताभरमा नकारात्मक देखिएको हो । नयाँ सरकार बनेदेखि नै सेयर बजार लगातार रुपमा बढीरहेको थियो ।
यो साता सेन्सेटिभ इण्डेक्स १.६५ अंक र फ्लोट इण्डेक्स १.२२ अंक घटेको छ भने सेन्सेटिभ फ्लोट इण्डेक्स ०.९१ अंक बढेको छ ।
यो साता नेप्से परिसूचकसँगै दैनिक औषत कारोबार रकम पनि कमी आएको छ । गत साता दैनिक २५ अर्ब ५९ करोड रुपैयाँको औषत कारोबार भएको बजारमा यो साता दैनिक औषतमा २२ अर्ब ३० करोडको सेयर खरिद बिक्री भएको छ । यो साता गत साताको तुलनामा दैनिक औषत कारोबार रकम १२.३८ प्रतिशत अर्थात ३ अर्ब २८ करोड घटेको हो ।
त्यस्तै, यस साता दैनिक औषत सेयर संख्या १७.३४ प्रतिशत घटेको छ भने दैनिक औषत कारोबार संख्या १०.०३ प्रतिशत घटेको छ । यो साता नेप्सेको कुल बजार पुँजीकरण ०.८८ प्रतिशत घटेको छ । गत साताको अन्तिम कारोबार दिन ४७ खर्ब ६५ अर्ब रुपैयाँ रहेको नेप्सेको कुल बजार पुँजीकरण यो साता ४१ अर्ब घटेर ४७ खर्ब २४ अर्बमा सीमित भएको छ ।
यो साता १३ उपसमूहमध्ये ५ उपसमूहको परिसूचक बढेको छ भने ८ उपसमूहको परिसूचक घटेको छ । यस साता वित्त उपसमूहको परिसूचक सर्वाधिक ३.२९ प्रतिशत बढेको छ । गत साता ३८४८ दशमलव ७१ विन्दुमा बन्द भएको यो उपसमूहको परिसूचक यो साता १२६ दशमलव ७८ अंक बढेर ३९७५ दशमलव ४९ विन्दुमा पुगेको छ । अंकका आधारमा भने यो साता विकास बैंक उपसमूहको परिसूचक सर्वाधिक १६७ दशमलव ३२ अंक बढेको छ ।
यो साता व्यापार उपसमूहको परिसूचक सर्वाधिक ४.८९ प्रतिशत घटेको छ । यो उपसमूहको परिसूचक यस साता २०६ दशमलव ०८ अंक घटेर ४०१० दशमलव ०३ विन्दुमा झरेको छ । अंकका आधारमा यस साता होटल तथा पर्यटन उपसमूहको परिसूचक सर्वाधिक ३२८ दशमलव ६३ अंक घटेको छ ।