भाेजपुर । सरकारको घुम्नैपर्ने सय पर्यटकीय गन्तव्यभित्र पर्न सफल ‘मुन्दुम पदमार्ग’ विस्तारसँगै पुनर्निर्माण थालिएको छ । पदमार्गको स्विस सरकारको आर्थिक एवं प्राविधिक सहयोगमा संघीय सरकार, प्रदेश सरकार र गाउँपालिकाको लागत साझेदारीमा एक करोड लागतमा पहिलो चरणको पदमार्ग विस्तारसँगै पुनर्निर्माणको काम थालिएको हो ।
पदमार्ग निर्माणका विषयमा जानकारी गराउने उद्देश्यले पदमार्ग बनिरहेको हाँसपोखरीमा सार्वजनिक सुनुवाइसमेत गरिएको छ । सार्वजनिक सुनुवाइमार्फत योजनाको लागत, योजना सञ्चालन पद्धति, योजना सञ्चालन हुने क्षेत्र र पदमार्ग निर्माण अवधिलगायतको विषयमा सरोकारवाला पक्षलाई जानकारी दिइएको हो ।
यो पदमार्गलाई थप व्यवस्थित बनाउन पहिलो चरणमा ५.४४ किलोमिटर पदमार्ग निर्माण तथा पुनर्निर्माण थालिएको टेम्केमैयुङ गाउँपालिकाका प्रमुख प्रशासकीय अधिकृत अदित दाहालले जानकारी दिए । पदमार्गसँगै पयर्टकलाई लक्षित गरेर यहाँ तीनवटा सार्वजनिक शाैचालय, दुईवटा रात्रि विश्राम स्थल, एउटा खानेपानी धारा निर्माण गरिने उनको भनाइ छ ।
‘तीनवटा सरकार र स्विस सरकारको लागत साझेदारीमा मुन्दुम पदमार्गको थप विस्तारसँगै पुनर्निर्माण थालिएको छ,’ प्रशासकीय अधिकृत दाहालले भने, ‘यहाँ पर्यटकलाई लक्षित गरेर पदमार्ग निर्माणसँगै थप संरचनाहरू बन्नेछन् । यो निर्माण अवधि आगामी असार महिनासम्म रहेको छ ।’ पदमार्गको निर्माण तथा पुनर्निर्माणका लागि स्विस सरकारको ५१ प्रतिशत, गाउँपालिकाको २२ प्रतिशत, केन्द्र सरकारको पाँच प्रतिशत र प्रदेश सरकारको २२ प्रतिशत लागत साझेदारी रहेको प्रशासकीय अधिकृत दाहालले जानकारी दिए ।
मुन्दुम पदमार्ग गाउँपालिकाको गौरवको आयोजना रहेकाले यसको थप विकास तथा विस्तारमा जोड दिइएको गाउँपालिका उपाध्यक्ष रमादेवी राईले बताइन् । गाउँपालिकाले कृषि र पर्यटनलाई मुख्य प्राथमिकता राखेर यहाँका स्थानीयको समृद्धिको आधार तयार गर्ने लक्ष्यका साथ पदमार्ग विस्तार तथा विकासको काम गरिरहेको उपाध्यक्ष राईले बताइन् । पदमार्गले यहाँको धर्म, संस्कार, संस्कृति रहनसहन, रीतिरिवाजको जर्गेनासँगै स्थानीय कृषि उत्पादनलाई पर्यटनसँग जोड्न टेवा पुग्ने उनको भनाइ छ ।
‘मुन्दुम पदमार्ग हाम्रो गौरवको योजना हो,’ उनले भनिन्, ‘यहाँ जति पनि काम भइरहेका छन् यसले यहाँको विकास र समृद्धिलाई जोडेको छ । हामीले कृषि र पर्यटनलाई प्राथमिकतामा राखेर आर्थिक रूपमा सक्षम बनाउने लक्ष्यका साथ काम बढाइरहेको छौँ ।’ मुन्दुम मदमार्गमा आउने पदयात्रीहरूको सहज र सुरक्षित यात्राका लागि गाउँपालिकाले योजनाबद्ध रूपमा काम गरिरहेको उपाध्यक्ष राईले जानकारी दिइन् । पदमार्गलाई थप व्यवस्थित बनाउँदै स्थानीयको रोजगारी र जीविकोपार्जनसँग जोड्ने काम भइरहेको उनको भनाइ छ ।
मुन्दुम भ्रमण वर्ष सन् २०२५ घोषणा गरेर यसको प्रचारप्रसारसँगै विकासको काम भइरहेको उपाध्यक्ष राईले बताइन् । ‘मुन्दुम पदमार्ग पूर्वको स्थापित गन्तव्यको रूपमा विकास भइरहेको छ,’ उनले भनिन्, ‘पदमार्ग विस्तार भएपछि यहाँ आउने पर्यटकको संख्या बढिरहेको छ । पर्यटकको सहज, सरल, सुरक्षित र आरामदायी यात्राका लागि हामीले योजनाबद्ध रूपमा काम गरिरहेका छौँ।’ मुन्दुम पदमार्ग एक मात्र भर्जिन पदमार्ग रहेकाले यसलाई संरक्षण गर्न आवश्यक रहेको गाउँपालिका अध्यक्ष सरोज बस्नेतले बताए । सडक विस्तारका कारण पदमार्गलाई असर पुग्ने भएकाले यस्ता क्रियाकलापलाई रोक्न आवश्यक रहेको अध्यक्ष बस्नेतको भनाइ छ । मुन्दुम पदमार्ग नेपाल सरकारको एक सय गन्तव्यमा सूचीकृत मार्ग रहेकाले जिल्ला तथा छिमेकी जिल्लाका स्थानीय तहसँग सहकार्य गरेर विकास तथा विस्तार भइरहेको उनको भनाइ छ ।
‘मुन्दुम पदमार्ग एक भर्जिन पदमार्ग हो,’ अध्यक्ष बस्नेतले भने, ‘नेपालमा सायदै यस्ता स्थानहरू कमै मात्र छन् । सडक विस्तारका कारण यस्ता क्षेत्रहरुमा क्षति पुगेको अवस्था छ । पदमार्ग क्षेत्रको संरक्षणको लागि हामीले गम्भीर बन्न आवश्यक छ । एक करोड लागतमा भइरहेको पहिलो चरणको काम सम्पन्न भएपश्चात् यही आर्थिक वर्षमा सम्पन्न हुने गरी दोस्राे चरणमा ८५ लाखबराबरको निर्माणको काम हुने अध्यक्ष बस्नेतले जानकारी दिए । पदमार्गमा आधारित पर्यटन विकास परियोजनाअन्तर्गत दिगो र नवीनतम पर्यटन विकासको अवधारणाअनुसार यहाँ काम भइरहेको परियोजनाकी सामाजिक सुरक्षा अधिकृत पार्वती राणाले बताइन् । पर्यटनमार्फत यहाँका समुदायको आर्थिक अवस्थामा सुधार ल्याउने खालका क्रियाकलाप सञ्चालन हुने उनको भनाइ छ । पदमार्गमा रहेका होटेल व्यवसायीको क्षमता अभिवृद्धिसँगै पाहुनालाई दिने सेवा तथा व्यवहारको विषयमा तालिम तथा सचेतनाका कार्यक्रम सञ्चालन हुने अधिकृत राणाको भनाइ छ ।
यो पदमार्ग क्षेत्रमा टेम्केमैयुङ गाउँपालिकाका १०७ जनाले काम गरिरहेको निर्माण उपभोक्ता समितिको अध्यक्ष रहिम राईले जानकारी दिए । पदमार्ग निर्माणले पर्यटनको विकाससँगै स्थानीयस्तरमा रोजगारी सिर्जना भइरहेको उनको भनाइ छ । पदमार्ग क्षेत्रमा ६ वटा समूह निर्माण गरेर विभिन्न स्थानमा काम भइरहेको उनले जानकारी दिए ।