काठमाडौं । साताको कारोबार हुने तेस्रो दिन मंगलबार पनि सेयर बजार परिसूचक घटेको छ । यो साताको कारोबार हुने पहिलो दिन देखिनै घट्न थालेको बजार लगातार तेस्रो दिन पनि घटेको हो ।
आजको कारोबार बन्द हुँदा सेयर बजार परिसूचक ६ दशमलव ३२ अंकले घटेर बन्द भएको छ । मंगलबारको कारोबार बन्द हुँदा सेयर बजार परिसूचक २६६९ दशमलव ८२ विन्दुमा पुगेको छ । अघिल्ला दुई दिन दोहोरो अंकले घटेको बजार आज भने एकल अंकले घटेर बन्द भएको हो ।
आज सेयर बजारमा कारोबार भएका १४८ कम्पनीको सेयर मूल्य घटेको छ भने ८५ कम्पनीको सेयर मूल्य भने घटेको छ । त्यस्तै १० कम्पनीको सेयर मूल्य भने स्थिर रहेको छ । त्यस्तै आज ‘क’ वर्गका कम्पनीको मापक सेन्सेटिभ इन्डेक्स पनि ० दशमलव ७५ अंकले घटेर ४५४ दशमलव ९१ विन्दुमा पुगेको छ । आज सेयर सेयर बजारमा १३ उपसूचकमध्ये ४ वटाको मात्रै सेयर मूल्य बढेको छ भने ९ उपसूचकको सेयर मूल्य घटेको छ ।
आज परिसूचकसँगै कारोबार रकममा पनि गिरावट आएको छ । अघिल्लो दिन साढे ५ अर्बभन्दा माथिको कारोबार भएको बजारमा आज ४ अर्ब भन्दा केही बढीको कारोबार भएको छ । आज सेयर बजारमा ३०३ कम्पनीका ८७ लाख ६८ हजार ५६६ कित्ता सेयर ५२ हजार ७०५ पटक खरिद बिक्री हुँदा ४ अर्ब ४१ करोड ३३ लाख २० हजार २९० रुपैयाँ बराबरको कारोबार भएको छ ।