काठमाडौं । राष्ट्रिय बीमा कम्पनीको प्रतिसेयर आम्दानी (ईपीएस) सँगै नाफामा पनि सुधार देखिएको छ । कम्पनीले सार्वजनिक गरेको चालु आर्थिक वर्षको पहिलो त्रैमासिकको अपरिष्कृत वित्तीय विवरण अनुसार नाफासँगै ईपीएसमा सुधार देखिएको हो ।
चालु आवको पहिलो तीन महिनासम्ममा कम्पनीको नाफामा १३.७३ प्रतिशतले वृद्धि भएको छ । गत आवमा कम्पनीले १३ करोड ७६ लाख रुपैयाँ नाफा कमाएकोमा चालु आवमा १५ करोड ६५ लाख रुपैयाँ नाफा पु¥याएको छ । चालू आवमा कम्पनीको आम्दानीमा वृद्धि भएसँगै नाफामा टेवा पुगेको हो । गत आवमा कम्पनीको कुल आम्दानी ३१ करोड ३६ लाख रुपैयाँ रहेकोमा चालू आवमा बढेर ४१ करोड ५१ लाख रुपैयाँभन्दा बढी पुगेको छ ।
गत आवको प्रथम त्रैमाससम्म कम्पनीले ८ करोड ३८ लाख रुपैयाँ खुद बीमाशुल्क आर्जन गरेकोमा चालु आवमा उक्त रकम १८ करोड ७७ लाख रुपैयाँ पुगेको छ ।कम्पनीको चुक्ता पुँजी २६ करोड ६६ लाख रुपैयाँ छ । कम्पनीको प्रथम त्रैमाससम्म रिटेन्ड अर्निङमा २ अर्ब ३३ करोड ५ लाख रुपैयाँ, महाविपत्ति कोषमा ६६ करोड ५१ लाख रुपैयाँ र स्पेसल रिजर्भमा ३ अर्ब १ करोेड ८० लाख रुपैयाँ सञ्चित रहेको छ ।
नाफा वृद्धि भएसँगै कम्पनीको प्रतिसेयर आम्दानी (ईपीएस) पनि वृद्धि भएको छ । गत आवको पहिलो त्रैमासिकसम्म कम्पनीको प्रतिसेयर आम्दानी ५१ रुपैयाँ ६३ पैसा रहेकोमा चालु आवमा बढेर ५८ रुपैयाँ ७२ पैसा पुगेको छ । त्यस्तै, कम्पनीको प्रतिसेयर नेटवर्थ १ हजार २२३ रुपैयाँ ५२ पैसा छ ।