काठमाडौं । ऊर्जा जलस्रोत तथा सिंचाई मन्त्री दीपक खड्काले काटिएका उद्योगमा विद्युत् जोड्न नेपाल विद्युत प्राधिकरणको सञ्चालक समितिको बैठक बस्न आवश्यक नभएको बताएका छन् । लाल आयोगको प्रतिवेदन सार्वजनिक गर्न ऊर्जा मन्त्रालयले सोमबार आयोजना गरेको पत्रकार सम्मेलनमा बोल्दै मन्त्री खड्काले बोर्डभन्दा माथि मन्त्रिपरिषद् हुने भएकाले बोर्डको निर्णय कुरिराख्नु नपर्ने बताएका हुन् ।
यद्दपि मन्त्रिपरिषद्को निर्णय पाएको २४ घन्टाभित्र बोर्ड बैठक बस्ने जानकारी उनले गराए । मन्त्रिपरिषद्को निर्णयबारे प्राधिकरणलाई जानकारी पठाइसकिएकाले आजै उद्योगहरुमा बिजुली जोडिने उनको भनाइ छ । मन्त्री खड्काले १५ दिनभित्र विद्युत महसुल उठाउन के कति भन्ने निर्क्यौल गरेर असुल उपर गर्न प्रक्रिया थाल्न प्राधिकरणलाई पत्राचार भइसकेको उनले बताए ।