काठमाडौं । आईसीसी विश्वकप क्रिकेट लिग–२ मा नेपालले दोस्रो जित निकालेको छ । नेपालले पहिलो खेल जितेको ८ महिना पछि दोस्रो जित निकाल्न सफल भएको हो ।
दोस्रो जित निकालेल्ने क्रममा नेपालले अमेरिकामा भइरहेको शृङ्खलाअन्तर्गत आफ्नो दोस्रो खेलमा स्कटल्याण्डलाई पाँच विकेटले हराएको छ । स्कटल्याण्ड तालिकाको चौथो स्थानमा रहेको टोलि हो । शीर्ष चार स्थानमा रहेको टोलिलाई पराजित गरेसँगै आगामी खेलमा नेपालको मनोबल उच्च हुनेछ । एसोसिएट राष्ट्रमा स्कटल्याण्ड बलियो टोलि हो ।
अमेरिकाको डालसमा स्कटल्याण्डले दिएको १ सय ५५ रनको लक्ष्य नेपालले २९ ओभर ५ बलमा भेट्टायो । नेपालका आरिफ शेखले सर्वाधिक ५१ रन अविजित पारी खेले । कुशल भुर्तेल र गुल्सन झाले २५/२५ रन जोडे । आसिफ शेखले २१ रन बनाए । स्कटल्याण्डका ब्राण्डम म्याकुलमले २ विकेट लिए ।
त्यसअघि टस जितेर नेपालले बलिङ रोजेको थियो । जसमा नेपाली बलरहरु खरो रुपमा उत्रेका थिए । नेपालले स्कटल्याण्डलाई ४१ ओभर ४ बलमा १५४ रनमा रोकेको थियो । स्कटल्याण्डका मार्क वाटले सर्वाधिक ३४ रन बनाए । नेपालका सन्दीप लामिछानेले ३ विकेट लिए । करण केसी, सोमपाल कामी र गुल्सन झाले २/२ विकेट तथा आरिफ शेखले १ विकेट लिए । लिग–२ अन्तर्गत त्रिकोणात्मक शृङ्खलाको पहिलो खेलमा नेपाल घरेलु टोली अमेरिकासँग ३ विकेटले पराजित भएको थियो । त्यस्तै स्कटल्याण्डले आफ्नो पहिलो खेलमा अमेरिकालाई १० विकेटले हराएको थियो ।
तालिकाको सातौँ स्थानमा रहेको नेपालको १० खेलमा ५ अंक भएको छ । स्कटल्याण्ड ९ खेलमा ११ अंकका साथ चौथो स्थानमा छ । शीर्ष स्थानमा रहेको क्यानडाको १२ खेलमा १६ अंक छ ।