बाँके । आदिवासी जनजातिका परम्परागत कला, संस्कृति, रीतिरिवाज र वेशभूषा संरक्षण र प्रवर्द्धन गर्न नेपालगञ्जमा सांस्कृतिक महोत्सव आयोजना गरिने भएको छ । नेपाल आदिवासी जनजाति महासंघ जिल्ला समन्वय परिषद्ले ‘विश्वभरि फैलिएका हामी जनजाति हामी आदिवासी, जोगाइ राखौँ वेशभूषा, भाषा, संस्कृति’ भन्ने मूल नाराका साथ यही कात्तिक २९ देखि मङ्सिर १८ गतेसम्म नेपालगञ्जमा सांस्कृतिक महोत्सव २०८१ सञ्चालन गर्ने भएको हो ।

कला तथा संस्कृति संरक्षणसहित संस्थाको भवन निर्माण सहयोगार्थ सञ्चालन गर्न लागिएको महोत्सवमा जाति, जनजाति, कला, संस्कृति संरक्षणका साथै राष्ट्रिय ख्यातिप्राप्त कलाकारहरूले मनोरञ्जन प्रदान गरिने नेपाल आदिवासी जनजाति महासंघ जिल्ला समन्वय परिषद्का अध्यक्ष डम्बरबहादुर थापामगरले जानकारी दिए । ‘आदिवासी जनजातिका परम्परागत रीतिरिवाज, चालचलन, कला, संस्कृति, वेशभूषालगायत सम्बन्धित सबै कुरा पछिल्लो समयमा हराउँदै जान थालेका छन्,’ उनले भने, ‘यसलाई संरक्षण, जगेर्ना र प्रवर्द्धन तथा प्रचारप्रसार गर्ने उद्देश्यका साथ नेपालगञ्जमा महोत्सव आयोजना गर्न लागिएको हो ।’

महोत्सवभर आदिवासी जनजातिका कला, संस्कृतिसम्बन्धी पौराणिक कला जातीय वेशभूषाको प्रदर्शन गरिने, कृषि पर्यटन हस्तकलासहितका प्रदर्शनी कक्ष राखिने, लुम्बिनी प्रदेशका १२ वटै जिल्लामा रहेका धार्मिक तथा पर्यटकीयस्थल प्रदर्शनी गरिने तथा जातीय खाना प्रदर्शनी गरिने अध्यक्ष थापामगरको भनाइ छ । महोत्सव अवधिभर तीन लाख दर्शकले मेला अवलोकन गर्ने र रु पाँच करोड बराबरको आर्थिक कारोबार हुने अपेक्षा गरिएको छ । महोत्सव सफल पार्न अध्यक्ष थापामगरको संयोजकत्वमा मूल आयोजक समिति र सचिव राजन रानामगरको संयोजकत्वमा सचिवालय गठन गरिएको छ ।

महोत्सवलाई व्यवस्थित रूपले सम्पन्न गर्न कृष्ण पुनमगरको संयोजकत्वमा सल्लाहकार उपसमिति, भूपेन्द्र पुनमगरको संयोजकत्वमा सुरक्षा उपसमिति, अजय पुनमगर (गोपाल)को संयोजकत्वमा आर्थिक उपसमिति, सङ्गीता चौधरीको संयोजकत्वमा अतिथि सत्कार उपसमिति, गनबहादुर गुरुङको संयोजकत्वमा झाँकी र्याली व्यवस्थापन उपसमिति, सुन्दर गुरुङको संयोजकत्वमा सांस्कृतिक उपसमिति, आइत पुनमगरको संयोजकत्वमा खानेपानी तथा शौचालय उपसमिति, जनक पहराई मगरको संयोजकत्वमा स्वयंसेवक उपसमिति र अशोक थापामगरको संयोजकत्वमा प्रचारप्रसार उपसमिति गठन गरिएको महासंघका सचिव राजन रानामगरले बताए ।