सिन्धुपाल्चोक । जिल्लाको साँगाचोकगढी नगरपालिका–१४ डडुवाका किसान ओमबहादुर बस्नेत आफूले सुरु गरेको ‘ड्रागन फ्रुट’ खेतीबाट मनग्य आम्दानी गरिरहेका छन् । उनले ‘ड्रागन फ्रुट’ खेतीबाट वार्षिक रुपमा १५ लाख रुपैयाँ आम्दानी गरिरहेका हुन् ।
‘ड्रागन फ्रुट’ खेतीबाट मनग्य आम्दानी भएपछि उनी अहिले खेती विस्तारको योजनामा समेत रहेको छन् । ६ रोपनीबाट खेती सुरु गरेका उनले स्वदेशमा ग¥यो भने सम्भव छ भन्ने उदाहरण दिएका छन् । उनले स्वदेशमा नै पाखुरा बजार्न युवा पुस्तालाई आग्रह समेत गर्ने गरेका छन् । बजारमा ड्रागन फ्रुटको उच्च माग भएकाले मागअनुसार आपूर्ति गर्न आफूलाई हम्मेहम्मे परेको उनले सुनाए ।
विदेश जाने खर्च आफ्नै घरगाउँमा ड्रागन फ्रुटका लागि गरेमा वार्षिक रु १२ देखि १५ लाखसम्म कमाउन सकिने उनको सुझाव छ । जुनसुकै मौसम र माटोमा यो फल लाग्ने भएकाले उनले युवालाई स्वदेशमा नै श्रम गर्न सुझाब दिए । वर्षको दुईपटक उत्पादन हुने ड्रागन फ्रुट प्रतिकिला ५०० भन्दा बढीमा बिक्री हुने गरेको छ ।
चौतारा साँगाचोकगढी नगरपालिकाले ड्रागन फ्रुटखेतीलाई प्रोत्साहन गर्न तारबारका लागि रु चार लाखसहयोग गरेको छ । एकपटक बिरूवा लगाएपछि समय–समयमा सामान्य गोडमेल र सिँचाइबाहेक अन्य काम गर्नु नपर्ने र रोपेको दुई वर्षदेखि लगातार लामो समयसम्म फल दिने हुनाले अन्य खेतीबालीको तुलनामा यसको खेतीबाट प्रशस्त आम्दानी हुने उनी बताउँछन् ।